Dagate halaalaancho mashalaqqe iillishatenni kaphu duduwo gargara baalunku qeecha

Dagate halaalaancho mashalaqqe iillishatenni kaphu duduwo gargara baalunku qeecha ikkitinota Sidaamu Dagoomu Qoqqowu Mootimma Pirees Sekireetaariyaate Sooreessi Kalaa Filiphoosi Naahoomihu xawisino.

Kalaa Filiphoosi tenne xawisinohu qoqqowu yannate hajubba aana xawishsha uy yannaraati.

Miidiyu bissano ikkituro hasidhanno taje qoqqowu giddi seerunni tantannoonni uurrinshubbawa shiqqe adhite mashalaqqe tuqisa hasiissanota coyrino.

Qoqqowu giddo ga’labbote loosira balaxo uynenna illacha tunge loonsanni hee’noonnita kule; loonsoonni loosinni qansootu qoosso agaranteenna woleho lawishsha ikkanno garinni ga’labbote loosi loosamanni afamanno yiino.

Ga’labbote bissa dagate ledo halamatenni qinaabbe loossanni afantanno yiinohu Kalaa Filiphoos; ikkanna konni handaarinni naaxxisiisanno gumi maareekkamanni leellannota buuxisino.

Qasiisote afantanno qoqqowubbanna zoonna ledo nooha dancha xaadooshshe sufisiisate hajo la’anno bissa ledo yanna yannatenni xaandanni hegeraame ga’labbo wole qoqqowubbanna zoonna daga ledo heedhanno gede assate loosi kaajjino garinni sufanni afamannotano huwachiishino.

Xaa yannara qoqqowinke giddo noo keere booreessate, daga hembeelsatenna daganke mittimma diigate qoqqowo la’annokkitanna halaale ikkitinokki mashalaqqe kaphu qoollaranna addi addi dagoomitte miidiyubbaara fincinanni mashalaqqe co’ontanni kapho ikkitinota affe daganke qoropho assitanno gede qaagiissino.

Latishshu Loossa Lainohunni, qoqqowu giddo latishshu loossa halashshatenni maatete jireenya buuxisiisate illacha tunge loonsanni hee’noonnita coyre; gammoojjitte qooxeessuwara xeenu anjenni gawajjamino gide goyrete loosinni riqiwate roorimankanni alichaame ayyarete gade noo qooxeessuwara illacha tunge loonsanni hee’noonnita xawisino.

Tayxe dirinni goyrete loosinni calla 89,233 he/r latisate hende 91,222 he/r latisate dandiinoonnitano xawise; harunsine arro gorsu loosinni 67,000 he/r latisate hendoonni yiino.

Mootimmate widoonni diilallote gade soorronni baino gide riqiwate 47 miliyoone birranna; xeenu anjenni daggara dandiitanno hude gargarate mootimma balaxxe 50 miliyoone birra gaante loosu giddora e’e daga irkisate looso loossinotano Sooreessu xawsino.

Sai dirira arri qamade wixatenni ikkado guma maareekkisiisa dandiinoonnihura konni dirirano arri qamade wixate illacha tunge loonsannita huwachiishino.

Safote latishshi loossa lainohunni qoqqowo wolu qoqqowinni, woradda woraddatenninna olluubba olluubbatenni xaadissanno doogga tuqishshi hala'ladunni loosaminota coyrino.

Anganni xalalu way tuqishsha lainohunni qoqqowinke giddo 2012M.D geeshsha loosaminohu GTP-2 safaraanchi garinni baadiyyete 36%; quchumaho 50.35%; mereerimunni 38.2% illinoha ikkanna; 2013M.D kawa 515 nootanna haaro uurrinshubba ijaarsatenni baadiyyete 47.7%; quchumaho 59%; mereerimunni 49.5% iillishate dandiinoonnita xawisino.

Tayxe diri rosanna rosiisate amanyooti Wocawaaro 9/2015M.D kayse albiwinni woyyaawino garinni haranni nootano coyrino.

Konni dirira rosu isilanchimma lossatenna rosaanote guma woyyeessate illacha tunge loonsanni hee’noonnita xawise; haaru finoote kaarti garinni loosate sumuumme kalanqe qixxaawo gunde loosu giddora e’noonni yiino.

Qoqqowu deerrinni kiirotenni 71 ikkitannota balaxote rosi minna hallanyootu dureeyyenni minate qixxaawo gunde loosu giddora e’noonni yee, rosu isilanchimmara qoqqowu mootimma assitanno sharrora daga halante loossanno gede sokka saysino.

Sidaamu D/Q/M Pirezidaantete B/Mini

Wocawaaro 20-2015 MD

Hawaasa